Një tjetër grevë e përgjithshme ka paralizuar Greqinë sërish. Dita e mërkurë ka ka shënuar nisjen e grevës 48-orëshe, e cila është paralajmëruar si protesta më e madhe sociale e zhvilluar prej vitesh në shtetin fqinj. Greva vjen pikërisht në momentin kur Parlamenti përgatitet të votojë masat e reja shtesë me të cilat synohet të shmanget falimentimi.

Janë të të gjitha llojeve kategoritë e punonjësve që i janë bashkuar grevës. Kontrollorët e fluturimeve ajrore nuk do të kryejnë detyrën e tyre për të paktën 12 orë, çka pritet të shkaktojë probleme dhe vonesa edhe në trafikun ndërkombëtar. Të mbyllura janë shkollat, muzetë, ndërsa grevës i janë bashkuar edhe nëpunësit e administratës publike, mjekët, marinarët dhe taksistët.

Gjithashtu, të mbyllura janë zyrat, dyqanet ushqimore dhe pikat e furnizimit me karburant. Për më tepër, greva e gazetarëve ka pezulluar edhe emisionet e lajmeve. Në këtë situatë, vendi mbetet i paralizuar për dy ditë, të paktën këtë synojnë dy sindikatat më të mëdha në vend, ADEDY dhe GSEE, të cilat përfaqësojnë nëpunësit publikë dhe ata privatë.