Galeria e Arteve të Tetovës, hapi sot edicionin e dytë të kolonisë së arteve, në Kodrën e Diellit. Ministrja e kulturës Elizabeta Kanceska Milevska uroi artistët për punën e tyre, ndërsa drejtori i këtij institucioni Valmir Aziri tha se, kolonia e arteve edhe si vjet do të pasurojë fondin e galerisë me dhjetëra piktura. Aziri madje tha se po bëjnë përpjekje që ky eveniment të bëhet tradicional.

“Kolonia e arteve të Tetovës do vazhdojë që të jetë burim i disiplinave artistike, të cilat do të mund t’i shfrytëzojnë piktorët nga vende të ndryshme gjatë krijimit të punimeve që ne do t’i ndjejmë në pulsin e lirisë, fantazisë, kreativitetit, energjisë dhe potencialit”, tha Elizabeta Kanceska Milevska, Ministre e Kulturës.
 
“Ky eveniment i rëndësishëm  për kulturën dhe artin në qytetin tonë mbledh sërish artistët  nga vendi dhe rajoni, për të këmbyer sërish eksperienca dhe për ti bashkuar ato,  duke realizuar vepra unike. Ashtu si vitin e kaluar edhe këtë vit kolonia organizohet në Kodrën e Diellir si një nga vendet më të bukura të këtij rajoni  natyra dhe pozita e volitshme do jenë një shtytje edhe më e madhe për artistët të inspirohen dhe krijojnë vepra artistike gjatë dhjetë ditëve që do qëndrojnë këtu”, tha Valmir Aziri, drejtor i galerisë së Arteve të Tetovës.
 
Në koloninë e sivjetme marrin pjesë 15 artistë nga vendi dhe jashtë, të cilët në dhjetë ditët e ardhshme do kenë mundësinë e këmbimit të teknikave të punës si dhe vizitat e institucioneve të ndryshme në Tetovë.
 
“Shpresoj se këtu do ta shkëmbej eksperiencën time jashtë kufijve ku jam ambientuar, është bukur këtu njihesh me shoqëri të re dhe ambient të mirë”, tha Aliche Atanasia, piktore nga Italia.
 
“Është hera e parë që vij në Maqedoni dhe ajo që më pëlqen në këtë koloni është vendi i izoluar nga përditshmëria dhe është një mundësi e mirë për të pikturuar shumë mirë se në jetën e përditshme”, tha Suzana Arbanas  piktore SHBA.
 
Risi e këtij viti është pjesëmarrja e piktorëve nga SHBA-të dhe Italia.