Kur në fund të vitit të kaluar institucionet shqiptare janë deklaruar për një raport të UNESCO-s për Butrintin, ata kishin thënë se nuk është edhe aq keq. Megjithatë në raportin 25 faqesh i cili është zbuluar tek tani, ka mjaft kritika dhe sugjerime për autoritetet shqiptare të trashëgimisë.

Raporti bazohet në inspektimin e rrugës drejt Butrintit, menaxhimin e parkut, bashkëveprimin me autoritetet lokale dhe masat për ndërtimet pa leje në Ksamil, rekomandime që kishin ardhur më parë nga raporti i vitit 2007.

Raporti është shkruar nga Sinisha Sheshun, nga zyra e UNESCO-s në Venecia dhe Giora Solar nga ICOMOS-i, të shoqëruar nga Apollon Baçe, drejtor i Institutit të Monumenteve, Roland Olli, drejtor i Agjencisë së Shërbimit Arkeologjik, dhe drejtori i zyrës së administrimit dhe koordinimit të Butrintit, Rajmond Kola.

Në raportin e botuar të hënën nga mediat shqiptare, ata shprehin shqetësimet për zgjerimin e rrugës, cenimin e integritetit të parkut dhe problemet e mëdha në menaxhimin e tij. Ndonëse aktualisht rruga e zgjeruar që të çon në Butrint ka përfunduar, duket se një pjesë e madhe e rekomandimeve të bëra nga dy specialistët, nuk janë marrë parasysh.

“Për më tepër, ndërtimi i rrugës ashtu siç parashikohet në projekt, me një gjerësi prej 8.0 metra në hyrje të Parkut Kombëtar të Butrintit, nëse nuk ndryshon, përbën një kërcënim serioz si për integritetin ashtu edhe për autenticitetin e trashëgimisë botërore”, thuhet në raport.

Në kapitullin e pestë, në të cilin përfshihen sugjerimet dhe rekomandimet, thuhet se “zgjerimi i rrugës duhet ndaluar dhe nuk duhet të kryhet asnjë veprim i tillë nga distanca 100 metra nga parkimi i ri i autobusëve”. Nga ana tjetër, raporti ka shumë kritika për sa i përket menaxhimit të Parkut Arkeologjik të Butrintit.

“Në përgjithësi, vlerat e parkut janë ruajtur, por duhet të merren masa urgjente në planin e ri të menaxhimit për të siguruar një mbrojtje sa më të mirë të kësaj trashëgimie botërore, integritetit dhe autenticitetit”, theksohet në raport.