Pas uljeve drastike të djeshme, edhe sot vazhdojnë në pikiatë bursat europiane. Një alarm i vërtetë për ekonominë, ku tregjet më të mëdha europiane kanë humbur nga 3 deri në 4%. Shkojne keq edhe merkatot e bursave aziatike. Në Itali për shkak të rënies, janë pezulluar disa nga titujt me kryesor, si ato të Fiat-it dhe të bankave.

Ndërkohë që ari regjistron rekord të ri në rritje. Paraditen e sotme ari arriti maksimumin e mundshëm me 1.871 dollar/onk, me një rritje prej 2.6%. Ari është rritur me 57.2% në 12 muajt e fundit.

Bursat europiane jane duke rekuperuar në këto momente: Në Paris -1,4%, Frankfurt -2,5%, Milano -1,7% dhe Zyrih -1,6%.

Wall Street e nis keq qe me hapjen e tij, titujt e saj kryesor humbin kuota për shkak të vonesës së rimëkëmbjes financiare.

Parisi, Frankfurti dhe Londra, kanë regjistruar humbje nga 3 deri në 4%, kurse Milano ka kaluar 3% ne humbje.

Dy orë nga hapja e bursave europiane indekset e titujve kryesorë u shënuan: Në Londër -2,11%, Paris -2,74%, Frankfurt -3,63%, Madrid -2,55%, Milano -2,31%, Amsterdam -2,79%, Stokholm -2,61%, Zyrih -2,53%.

Parashikohet, që Prodhimi i Brendshëm Bruto (PBB) grek të ketë një ulje më të madh se -3.8% që ishte parashikuar, mendohet se ai do të arrijë në -4.5%, pra më shume se parashikimet e mëparshme. Këto janë parashikimet e ministrit të ri të financave grek, Evangelos Venizelos.

Investuesit janë të shqetësuar për faktin se rritja ekonomike botërore po ngadalësohet dhe ekonomitë kryesore mund të përballen sërish me rënie.

Të enjten banka e invetsimeve Morgan Stanley tha se SHBA dhe Europa ishin shumë pranë përballjes me rrezikun e rënies financiare.

Këto rënie të bursave pasojnë ato të një dite më parë në bursën amerikane dhe ato europiane duke kurorëzuar ndërkaq një javë rëniesh në tregjet financiare botërore.

Riçard Hanter, ekspert financiar londinez, tha se rëniet e fundit e çonin uljen e bursës në 16% këtë vit, duke shtuar kështu ndjeshëm nivelin e borxhit. "Po kuptojmë me keqardhje që politikanët ende nuk kanë hartuar plane përfundimtare për përballimin e situatës, gjë e cila do t’i qetësonte investuesit" tha ai.

Paraqitja e euros i ngjan dikujt që rend dhe bie nga shkëmbi vetëm sepse nuk merr mundimin të shohë poshtë tha një tjetër ekspert financiar amerikan. "Duket se ka një mos-koordinim të përpjekjeve për zgjidhjen e kësaj krize financiare”,- shprehen ekspertet.