Galeria Kombëtare e Londrës dhe Muzeu “Louvre” i Parisit kanë njoftuar për planet që të bëjnë bashkë të dy versionet e veprës “Virgin of the Rocks” të Leonardo da Vinçit.Muzeu i famshëm i kryeqytetit francez do të dërgojë versionin e tij në galerinë e Londrës, ku vepra do të ekspozohet në kuadër të një ekspozite të re.

Në kthim, galeria më pas do t’ia dërgojë institucionit francez veprën “The Virgin and Child With Saint Anne and John the Baptist”.

Drejtori i Galerisë Kombëtare të Londrës është shprehur i kënaqur me këtë bashkëpunim. Ai ka thënë se kolegët e tij i janë mirënjohës homologëve francezë për bashkëpunimin lidhur me pikturën e famshme.

Të dyja këto ekspozita do të hapen për të shënuar karrierën e artistit me nam dhe do të japin një rast unik që vizitorët të studiojnë punën e Da Vinçit.

Drejtori i muzeut “Louvre”, Henri Loyrette ka thënë se ky bashkëpunim mes të dyja galerive do të ofrojë një ballafaqim historik të dëshiruar prej kohësh nga historianët e artit.

Ekspozita me veprat e maestros në këtë muze do të hapet në mars të vitit të ardhshëm dhe do të jetë në dispozicion të vizitorëve deri në qershor.