Muzeu Kombëtar i Pavarësisë në qytetin e Vlorës në 100-vjetorin e Shpalljes së Pavarësisë Kombëtare do të ketë një "fytyrë" ndryshe.

Mjediset e këtij institucioni do të rikonceptohen, duke shfrytëzuar maksimalisht hapësirën e brendshme dhe duke zhvendosur jashtë godinës aktuale zyrat e administratës së këtij objekti me vlera historike dhe arkitekturore, raportojnë mediet shqiptare.

"Në kuadrin e përgatitjeve për 100-vjetorin e Shpalljes së Pavarësisë Kombëtare, është hartuar një projekt, që synon shkëputjen e pjesës së administratës nga ndërtesa e këtij muzeu, gjë që do të krijojë hapësira të reja dhe një simbolikë tjetër për raportet historike me ato aktuale", ka thënë për mediat shqiptare drejtori i muzeut, Agron Shehu.

Për në Ministrinë e Turizmit, të Kulturës, të Rinisë e të Sporteve të Shqipërisë është propozuar projekti që në territorin e muzeut të ndërtohen mjedise shtesë ku do të funksionojë administrata. Në këtë mënyrë, jo vetëm që do të krijohet një hapësirë tjetër brenda godinës për ridimensionimin e përmbajtjes së saj, por edhe simbolikisht, do të ndahen vlerat historike nga pjesa administrative.
Godina ku është vendosur muzeu kombëtar i shpalljes së Pavarësisë në qytetin e Vlorës është ndërtuar në shekullin XIX. /MIA/