Shoqëria Kulturor-Artistike, ‘Jehona’ e Malësisë së Sharrit, në festivalin ndërkombëtar të Valleve “Golden Karagose”, që u mbajt në qytetin e Brusës në Turqi, prej 5 deri më 13 korrik, ka shënuar sukses të madh duke arritur deri në gjysmëfinale, në një konkurencë prej 43 shteteve nga mbarë bota.

“Ishte kjo një përvojë e jashtëzakonshme për shoqërinë tonë, pasiqë atyre ditëve  Bursa ngjante në një kopsht me kolorite të jashtëzakonshme ku prezantoheshin më tepër se 40 shtete dhe kjo ishte një përvojë  e panjohur për neve deri tash, prandaj edhe knaqësia ishte e vecantë dhe nuk është lehtë  të përshkruhet por vetëm mundë të përjetohet”, tha Latif Latifi, Sekretar i SH.K.A. “JEHONA”.

Anëtarët e kësaj shoqërie shprehen jashtëzakonisht të kënaqur me mikpritjen që u është bërë nga ana e organizatorëve të cilat i kanë bërë ftesë  për të marr pjesë edhe një një festival tjetër ballkanik, por përveç kësaj paraqitjet e shkëlqyera të anëtarëve të këtij ansambli ka bërë që ky ansambël, të merr ftesa  për pjesëmarrje edhe festivale tjera botërore që do të mbahen si në Meksikë, Slloveni, Kroaci, Poloni, Greqi, Bullagri, Rusi dhe vende tjera.

“Tani në Bursë poashtu do ketë një festival tjetër Ballkanik dhe ftesa për të na bën të ndjehemi shumë krenar për prezantimin se është një dëshmi se vlerat tona u prezantuan më së miri”, tha Latif Latifi, Sekretar i SH.K.A. “JEHONA”.

Gjatë pjesëmarrjes në festivalin prestigjioz të Bursës në Turqi, folkloristët tetovar, janë paraqitur me disa valle të njohura nga Malësia e Tetovë dhe rrafshi i Pollogut, si ”Vallja e Nuses”, Vallja Flutura”, “Vallja e Sharrit”, “Kallanxhoj”, “Vallja Shqiponja etj.