Udhëzimet nga mjeku familjar, recetat për marrjen e ilaçeve në farmaci si dhe udhëzimet e tjera nëpër klinika do të bëhen në formë elektronike, ndërsa diagnoza e pacientëve do të jetë e mbrojtur dhe do ta dinë vetëm mjekët. Kështu paralajmëroi ministri i shëndetësisë Bujar Osmani i cili theksoi se ky proces ka nisur tashmë në dhjetëra Ambulanca e Spitale të vendit. Osmani thotë se në këtë proces, pacientët shqiptar do t’i marrin të gjitha udhëzimet në gjuhën shqipe, pjesë e këtij sistemi elektronik.

“Me këto ndryshime, ligji nënkupton se në tërë sistemin elektronik gjuha shqipe do të jetë gjuhë zyrtare”, tha Bujar Osmani, ministër i Shëndetësisë.

Sipas Osmanit, Maqedonia është shteti i parë në rajon që zbaton këtë reformë, ndërsa ministria po punon intensivisht që sistemi elektronik të jetë pjesë e gjithë sistemit shëndetësorë.

“Kjo hap një dimension të ri komunikimi ndërmjet shfrytëzuesit të shërbimeve shëndetësore dhe dhënësve të shërbimeve shëndetësore, duke filluar nga mjeku familjar, nga specialistët, nga spitalet.... Specialistët, nga tani do të kenë një pacient me një dosje të kompletuar elektronike me të gjitha të dhënat nga gjendja e tyre shëndetësore paraprake”, tha Bujar Osmani, ministër i Shëndetësisë.

Ministri i Shëndetësisë u shpreh se ky sistem do t’u mundësojë pacientëve që kontrollet e tyre mjekësore t’i bëjnë vetëm me librezën elektronike, pa marrë dokumentacione të shumta me vete, sepse ato do të jenë të evidentuara në mënyrë elektronike. /alsat-m/