Ekspozita e titulluar “Homo Urbanus Europeanus” e fotografit francez Zhan-Mark Karaçi, do të shpaloset në qendrën tregtare Ramstor, duke filluar nga 16 shkurti deri më 16 mars. Ekspozita, e përkrahur nga Delegacioni i Bashkimit Evropian në Shkup, përbëhet nga 60 fotografi që përfaqësojnë 31 kryeqytete në Evropë. Të gjitha janë të fotografuara në stilin e njëjtë, të qeta dhe pa ndonjë dukshmëri kulturore ose sociale, duke nxjerrë në pah ngjajshmërinë e dallimeve, apo “Evropianitetin” e shumëllojshmërive

Zhan-Mark Karaçi është fotograf francez. Ai u lind në Tunis, mirëpo që nga fëmijëria e hershme jetoi në Monpelje, në jug të Francës. Projekti "Homo Urbanus Europeanus" kryesisht përfaqëson personazhe të vetmuara, njerëz të fotografuar në sfonde urbane.

 Gjatë 3 viteve të punës së tij, Karaçi, i cili është fotograf autodidakt, ka bërë fotografi në 31 kryeqytete evropiane në suaza të projektit. Këtu përfshihen këto kryeqytete: Bratisllava, Riga, Vilnius, Sofja, Madridi, Varshava, Roma, Ljubljana, Zagrebi, Beogradi, Helsinki, Talini, Rejkjaviku, Parisi, Brukseli, Oslo, Stokholmi, Praga, Berlini, Lisbona, Bukureshti, Tirana, Budapesti, Viena, Athina, Luksemburgu, Kopenhaga, Amsterdami, Londra, Dablini... dhe në fund Stambolli, i cili edhepse nuk është kryeqyteti zyrtar i Turqisë, është pjesë e ekspozitës.