Nëpërmjet një konference për shtyp, kryetari i komunës së Tetovës Prof. Dr. Sadi Bexheti ka informuar qytetarët se për shkak të gjendjes së jashtëzakonshme të krijuar si pasojë e reshjeve të mëdha të borës, gjatë kësaj jave, respektivisht nga 6 deri më 10 shkurt do të ndërpritet procesi mësimor në të gjitha shkollat fillore dhe të mesme publike.

“Pas konsultimeve të mbajtura në Sektorin për Arsim është vendosur që të ketë ndërprerje të procesit mësimor, nga se sipas sinoptikëve mot i keq do të mbizotërojë përgjatë tërë javës”, tha kryetari Bexheti.
Sipas tij, ditët e humbura do të zëvendësohen gjatë të shtunave të ardhshme, pas përmirësimit të kushteve klimatike.

Gjatë konferencës për shtyp, kryetari Bexheti, ka informuar se Ndërmarrja Publike Komunale ka rritur intensitetin e punëve, po punohet përgjatë 24 orëve të me qëllim që të sigurohet një mirëmbajtje sa më efikase e të gjitha rrugëve në territorin e komunës së Tetovës. “Rëndësi më e madhe i është dhënë pastrimit të bulevardeve kryesore dhe rrugëve në fshatrat e malësisë së qytetit, ku paraqitet një gjendje shumë më e rënduar, ndërkohë që të gjitha rrugët në qytet janë të kalueshme”, tha kryetari Bexheti.

Ai iu ka bërë thirrje edhe qytetarëve që të ndihmojnë dhe që bashkërisht të tejkalojmë këtë situatë emergjente.