Pas angazhimit të Ferhan Hasanit në Wolfsburg, ekipi i Shkëndijës siç duket do të mbetet edhe pa shërbimet e talentit Mevlan Murati i cili ka gati 1 javë që po testohet në Gjermani. 17 vjeçari momentalisht gjendet në prova tek skuadra “KFC Uerdingen”, ndërkohë që pas dy ditëve do të testohet disa ditë edhe tek ekipi që luan në bundesligën gjermane Munchengladba. Këtë lajm e zbulon ekskluzivisht për gazetën “Zhurnal Plus” mesfushori tetovar. “Ka gati 1 javë që gjendem në Gjermani dhe këtu po ushtroj me ekipin e parë të Uerdingen. Kjo skuadër është një klub i cili luan në ligën rajonale mirëpo shumë e fuqishme dhe me një organizim fenomenal.

Personalisht jam i kënaqur me pritjen që më është bërë si dhe me faktin se drejtuesit tani më kanë shprehur dëshirën për të më angazhuar”, tha Murati, duke shtuar se nuk do të ngutet në vendimin e tij, pasi pas dy ditëve do të në testime tek Munchengladba. “Dihet se ky ekip luan në elitën gjermane, kurse së pari do të testohem tek të rinjtë e këtij klubi.
Unë do të jap maksimumin dhe do të tregoj potencialin tim, kurse se a do të mbetem në këtë ekip mbetet të shihet”, deklaroi tetovari, Mevlan Murati. Ndryshe, 17 vjeçari rregullisht ka luajtur për ekipin e të rinjve tek Shkëndija, kurse disa herë është ftuar edhe tek ekipi i parë. Nga ana tjetër, disa vite ka mbrojtur edhe ngjyrat e reprezentacionit të Maqedonisë për kategoritë e reja.