Maqedonia është nën mbulesën e dëborës e cila edhe mbrëmë u rrit për disa centimetra. Dëbora në Shkup, që pritej gjatë, në disa pjesë të qytetit e vështirëson lëvizjen e qytetarëve. Rrugët kryesore të qytetit që janë nën kompetencën e Qytetit të Shkupit janë të pastruara, por problemet krijohen në disa nga komunat, sepse nuk ka kompani të mjaftueshme që duhet ta kryejnë këtë punë. Që të parandalohet paraqitja e rrugëve me akull në Shkup, janë hedhur 304 ton kripë industriale, në rrugët kryesore të qytetit, nëpër ura, mbikalime, nënkalime dhe të ashtuquajturat "pika të zeza".

“Mendoj se Qyteti i Shkupit me sukses po përballet me pastrimin e borës nëpër rrugët që janë kompetencë e Qytetit të Shkupit, kështu që është angazhuar ndërmarrja publike për pastrimin e rrugëve dhe një firmë tjetër private me automjete të specializuara për të pastruar borën dhe për hedhjen e kripës nëpër rrugë”, deklaroi Koce Trajanovski, kryebashkiak i Shkupit.
Sipas të dhënave të Lidhjes Auto-moto të Maqedonisë trafiku në të gjitha rrugët nëpër vend është vështirësuar pas reshjeve të dëborës. Ndalesa për lëvizje ka vetëm për kamionët e rëndë në drejtimet rrugore: Mavrovë - Dibër, Strugë - Kalimi kufitar Qafëthanë, pjesët malore të Strazhës, Gjavato dhe Preseka. Kujdes rekomandohet për rrugën Katllanovë- Veles dhe Dibër-Strugë, ku ka dukuri të rrëshqitjeve të dheut. Nga ndërmarrja “Makedonia pat” thonë se të gjitha ekipet e tyre po punojnë në terren dhe i pastrojnë rrugët. Kamera e televizionit Alsat-M, në mëngjes rreth orës 10 e regjistroi autostradën e papastruar Shkup-Kumanovë, ku trafiku zhvillohej me vështirësi.
“Edhe pse ndërmarrja “Makedonia pat” ka obligim që t’i pastrojë autostradat në vend, ky nuk është rast me autostradën Shkup-Kumanovë. Këtu lëvizja bëhet vërtetë me vështirësi dhe qytetarët nuk mund t’i kryejnë detyrat e tyre të rregullta të përditshme”
Ekipet e ndërmarrjes”Makedonia pat” rreth gjysmë ore pas regjistrimit të bërë ngadalë filloi ta pastrojë autostradën dhe ta heqë dëborën nga rruga. Sipas Lidhjes Auto-moto të Maqedonisë, pasqyra e përgjithshme tregon se intensiteti i trafikut është më i matur në drejtimet rrugore jashtë zonave urbane, kurse në kalimet kufitare nuk vërehen ndalime më të gjata për hyrje dhe dalje nga vendi. Sipas të dhënave të Entit hidrometeorologjik, borë do të bjerë edhe gjatë fundjavës, kurse temperaturat do të sillen prej minus 4 deri në 7 gradë celsius. Ftohja e re e motit pritet prej të dielës në mbrëmje