Serbët të cilët studiojnë në Universitet në veri të Mitrovicës, pa asnjë problem mund t’i vazhdojnë studimet në Maqedoni, pasi që ata paisen me diplomë serbe dhe jo kosovare. Procesi i nostrifikimit të diplomave nga Kosova po zgjat shumë në Maqedoni për arsye se ky shtet nuk ka vulë apostile dhe meqë shteti serb ka një vulë të tillë, studentet serb të Mitrovicës pa problem mund të vazhdojnë studimet në Maqedoni. Sipas zëdhënëses të Ministrisë së Arsimit, Shkencës dhe Teknologjisë në Kosovë, Besa Bytyqi tha se edhe përkundër përpjekjeve të qeverisë kosovare që ky universitet ose të funksionojë në kuadër të Universitetit të Prishtinës apo të mos funksionoj fare, ai vazhdon të funksionojë. “Studentët serb që studiojnë në veri të Mitrovicës pajisen me diploma serbe. Qeveria Kosovare ka tentuar që të mos lejojë këtë gjë, por për momentin situate është e tillë”, tha Bytyqi.

Kurse studentët të cilët kanë diplomuar në Kosovë do të duhet të presin edhe më tej për nostrifikimin e diplomave të tyre nga ana e Ministrisë së Arsimit dhe Shkencës (MASH) në Maqedoni. Sipas ministrit Pançe Kralev, nostrifikimi është në procedurë por me qenë se nuk ka marrëveshje bilaterale mes Kosovës dhe Maqedonisë, kjo procedurë zgjat më shumë kohë. “Procedura e nostrifikimit për diplomat jashtë vendit është se komisioni vendos për secilin lëndë se a është në rregull. Ka shumë diploma që janë për tu nostrifikuar nga Kosova që janë në procedurë. Për të thjeshtësuar procedurën duhet të nënshkruhet një marrëveshje bilaterale mes këtyre dy shteteve. Së shpejti do të nënshkruhet një marrëveshje e tillë pasi që komisionet janë duke punuar në këtë drejtim”, tha Kralev. Ndërkaq sipas profesorëve universitarë vonesa e nostrifikimit të diplomave po dëmton seriozisht rininë shqiptare në Maqedoni. Ata thonë se nëse institucionet përkatëse do të donin që ky proces të përfundojë më herët dhe nëse do të kishin vullnet, do ta arrinin atë. Kurse personat të cilët kanë kryer fakultetin në Universitetet e Prishtinës, ende presin që diplomat e tyre të nostrifikohen nga Ministria e Arsimit dhe Shkencës (MASH), në Maqedoni. Ata ankohen se tani më tetë muaj dokumentet e tyre qëndrojnë në zyre të MASH-it duke u pritur që të nostrifikohen, por kjo gjë assesi të ndodh. Nga Ministria e Arsimit dhe Shkencës (MASH), në Kosovë , thonë se puna është e kryer tani pritet vetëm edhe Maqedonia të përfundojë këtë proces.