Pas ngjarjeve të fundit të shkaktuara në Vevçan dhe Strugë, presidenti Gjorge Ivanov thirri në një takim të përbashkët kryetarin e Bashkësisë Islame Sulejman Rexhepi dhe kreun e kishës ortodokse, imzot Stefanin. Ivanov kërkoi nga liderët fetarë të investojnë autoritetin e tyre dhe të ndikojnë në mirëkuptim më të madh ndërfetar.

Presidenti Ivanov, arqipeshkvi Stefan si dhe kreu i BFI-së Rexhepi, dolën me një qëndrim të përbashkët, për përgjegjësi dhe mbështetje të marrëdhënie tradicionale ndërfetare dhe kulturën e tolerancës. Po ashtu, në qëndrimin e përbashkët theksohet se ‘çdo incident i izoluar, kudo që të ndodhë, duhet të dënohet nga ana e të gjithëve’. Presidenti Ivanov pret që autorët e incidentit, të nxirren para drejtësisë, sipas ligjit. Bashkëbiseduesit shprehën bindjen se tradita e bashkëjetesës është me vlerë, dhe përfituese për të gjithë qytetarët e Maqedonisë.