Mesfushori shqiptar, Jurgen Gjasula foli dje sërish për pamundësinë e tij për të luajtur me përfaqësuesen shqiptare, ndonëse ai tha se do të kishte pasur shumë dëshirë të përfaqësonte vendin e tij. Futbollisti e bëri këtë koment në një intervistë me “transfermarkt.de”.

“Kam marrë shpesh ftesa nga përfaqësuesja shqiptare, por problemi është se kam një pasaportë gjermane dhe më duhet të heq dorë prej saj që të marr pasaportën shqiptare, gjë që nuk dëshiroj ta bëj. Fatkeqësisht jo gjithmonë është mundësia për dyshtetësinë. Në të kundërt do të kisha pranuar menjëherë të luaja për kuqezinjtë”, tha futbollisti i lindur në Tiranë, por i rritur në Gjermani, transmeton SportEkspress.

Më pas ai ka folur edhe për transferimin te Duisburgu dhe mundësinë që të luajë shumë shpejt në Bundesligë. "U transferova te Duisburgu, pasi dëshiroja të bëja një hap përpara në karrierë. Kisha shumë oferta, por vendosa për Duisburgun dhe jam i lumtur", tha Gjasula. "Gjërat këtë edicion nuk shkuan në mënyrën më të mirë për shkak të ndryshimeve të shpeshta në stafin teknik, por edicionin tjetër do të luajmë një rol të madh në Bundesliga 2". Gjasula këtë edicion ka luajtur 18 ndeshje dhe ka shënuar një gol.