Ende nuk ka zgjidhje për statusin e ish-ushtarëve të Ushtrisë Çlirimtare Kombëtare. Ministri i Drejtësisë, Blerim Bexheti edhe pse kohë më parë u shpreh se për çështjen në fjalë do të informojë institucionet më të larta në vend, një gjë e tillë nuk ka ndodhur. Megjithatë, ministri Bexheti arsyetohet se puna e ministrave shqiptarë akoma nuk ka përfunduar. “Puna e ministrave nuk ka përfunduar dhe vazhdon edhe më tutje. Programi i BDI-së është i qartë dhe normalisht se gjitha kërkesat ashtu siç janë shqyrtuar dhe janë zgjidhur disa deri më tani, vazhdojnë edhe më tej të jenë në axhendën tonë”, deklaroi Blerim Bexheti, Ministër i Drejtësisë.

Ndërkohë, ministri Bexheti tha se është i gatshëm ti përgjigjet kërkesës së kryetarit të SHVL-UÇK-së, Fazli Veliu që ministrat shqiptarë të ndajnë një pjesë të pagave të tyre derisa të ketë zgjidhje për këtë kategori njerëzish.
“A do të kishit ndarë një pjesë të pagës suaj ashtu siç propozoi Fali Veliu për dëshmorët?”.
“Do të ishte një nder dhe kënaqësi nëse ajo është zgjidhja, por neve kemi përcaktimin për një zgjidhje tjetër”, përgjigjet Blerim Bexheti, Ministër i Drejtësisë.
Kryetari i SHVL-UÇK-së, Fazli Veliu ditë më parë pranoi dështimin e ultimatumeve të tij lidhur me zgjidhjen e statusit të ish pjesëtarëve të UÇK-së. Veliu nëpërmjet një komunikate, shprehu keqardhjen e tij drejtuar familjeve të dëshmorëve dhe me këtë rast tha se përsëri do të vazhdojë të punojë për rregullimin e statusit të ish-pjesëtarëve të UÇK-së edhe atë në qendrat shqiptare, Tiranë e Prishtinë, si dhe në Shkupin e Iliro-Maqedonisë.