Sipas “Corriere dello Sport”, Milani nuk ka nënshkruar ende me sulmuesin e Mançester Sitit, Karlos Tevez. Kampionët e Serisë A blenë sulmuesin argjentinas të Katanias, Maksi Lopez, pasi dështuan në një marrëveshje me klubin anglez për Tevezin.

Zëvendëspresidenti i Milanit, Adriano Galiani, ka deklaruar se skuadra e tij vetëm do të rihapë negociatat për Tevezin në qershor, por zëra të rinj sugjerojnë se do të bëhet një përpjekje e fundit për të nënshkruar me sulmuesin argjentinas në formë huazimi në janar. Besohet se dy klubet janë ende në distancë të largët në negociatat për Tevezin. Mançester Siti kërkon 8 milionë euro si kompensim në rast se Milani nuk do të shpenzojë 24 milionë eurot e tyre si mundësi për blerjen e sulmuesit në fund të sezonit. Argjentinasi ndodhet në vendlindje dhe ka refuzuar të luajë me skuadrën e Mançester Sitit që nga muaji shtator në ndeshjen e fazës së grupeve në Champions League kundër gjigandëve gjermanë të Bajernit të Mynihut.