Bashkëpunimi i PDSH-së me RDK-në, pritet të shqyrtohet në mbledhjen e sotme të kryesisë qendrore të partisë së Thaçit. Burime brenda PDSH-së njoftojnë se mbledhja e kryesisë së partisë është thirrur menjëherë pas reagimit të anëtarit të kryesisë qendrore të këtij subjekti politik Orhan Ibrahimi, ndaj kryetarit të RDK-së, rreth takimit që ky i fundit kishte realizuar në Strumicë me nënkryetarin e LSDM-së Zoran Zaev. Deputeti dhe anëtari i kryesisë qendrore të PDSH-së Orhan Ibrahimi të shtunën në linjë telefonike për ALSAT M reagoi ndaj takimit të Osmanit me Zaevin, duke thënë se do të kërkojë nga kryesia qendrore të debatojnë për këtë çështje.

“Unë ju siguroj se PDSH-ja asnjëherë nuk do të lejoj që të ketë platformë të përbashkët me ndonjë nga partitë maqedonase qoftë LSDM, qoftë VMRO, që nënkupton se ne si PDSH nuk mund të kemi platformë të përbashkët me ndonjë parti politike shqiptare e cila ka platformë të përbashkët qoftë me VMRO-në ose LSDM-në. Bashkëpunimet e kësaj natyre janë jo parimore për shkak se në Maqedoni ende nuk është krijuar vetëdija për ndërrim të kursit politik që i margjinalizon shqiptarët”, tha Orhan Ibrahimi, anëtar i kryesisë qendrore të PDSH-së
Nga RDK-ja enden nuk kanë komentuar reagimin e deputetit Ibrahimi. Kryetari i RDK-së Rufi Osmani gjatë një takimi që realizoi me nënkryetarin e LSDM-së dhe kryetarin e Komunës së Strumicës Zoran Zaev, përpos çështjeve lokale që i tangojnë dy Komunat Gostivarit dhe Strumicës, kanë biseduar edhe për zhvillimet politike në vend siç është çështja e emrit dhe fyerjet e fundit drejtuar në adresë të shqiptarëve. Veç kësaj është biseduar edhe për mundësinë e bashkëpunimit me partinë e Cërvenkovskit, gjë që ka shkaktuar reagime të ashpra në partinë e Thaçit. Iniciativa për bashkëpunim mes PDSH-së dhe RDK-së lindën gjatë një takimi që në selinë e PDSH-së në dhjetor të vitit të kaluar realizuan Menduh Thaçi dhe Rufi Osmani