Pas informacioneve të Entit hidrometeorologjik për valën e të ftohtit polar në Maqedoni gjatë fundjavës dhe javës së ardhshme, Komisioni për ndryshime klimatike pranë Ministrisë së Shëndetësisë ka drejtuar disa rekomandime për qytetarët.

Kjo ministri apeloi që të gjitha spitalet me kohë të ndërmarrin masa për ngrohjen adekuate të hapësirave të tyre si spitalore ashtu edhe ambulancave. 

Rekomandim edhe për institucionet arsimore, sociale dhe të tjerat që me kohë të marrin masat për ngrohjen e ambienteve të mësimit dhe punës, dhe kujdesit ndaj fëmijëve nëpër shkolla dhe pleqve nëpër spitale dhe qendrat përkujdesëse. 

Komisioni rekomandon qytetarët që të shmangin daljet e panevojshme nga shtëpia, sidomos personat me sëmundje kronike dhe të moshuarit, mbajtja e rrobave të thata dhe të ngrohta, qëndrim në hapësira të ngrohta, konsumimi i pijeve të ngrohta, shmangia e pijeve alkoolike si dhe kujdes gjatë lëvizjeve për shkak të ngricave. 

Gjithashtu apelohet që organizatat e punës dhe punëtorit të sigurojnë ambiente të ngrohta me qëllim të shmangies së rrezikut në punë për të gjithë punëtorët. 

Gjatë fundjavës dhe nga java e ardshme janë paralajmëruar temperatura të ulta polare, që në disa vende të arrijnë deri në - 20 gradë celsius.