Takimi i kreut të RDK-së Rufi Osmani me nënkryetarin e LSDM-së dhe njëherit kryetar i Strumicës Zoran Zaev, që vjen nga radhët e LSDM-së, ka nxitur reagimin personal të anëtarit të kryesisë qendrore të PDSH-së dhe njëherit deputet i kësaj partie Orhan Ibrahimi, i cili shprehet i prerë se do të kërkoj nga kryesia e PDSH-së që të debatoj lidhur me bashkëpunimin e mëtejmë të PDSH-së me RDK-në e Osmanit.

“Jam i habitur me këtë takim të realizuar në Strumicë në mes të kryetarit të RDK-së dhe nënkryetarit të LSDM-së Zoran Zaev. Por unë ju siguroj se PDSH-ja asnjëherë nuk do të lejoj që ët ketë platformë të përbashkët me ndonjë nga partitë maqedonase qoftë LSDM, qoftë VMRO, që nënkupton se ne si PDSH nuk mund të kemi platformë të përbashkët me ndonjë parti politike shqiptare e cila ka platformë të përbashkët qoftë me VMRO-në ose LSDM-në. Bashkëpunimet e kësaj natyre janë jo parimore për shkak se në Maqedoni ende nuk është krijuar vetëdija për ndërrim të kursit politik që i margjinalizon shqiptarët. Ideja e krijimit të unitetit kombëtarë nuk bëhet në këtë mënyrë por e kundërta. Në këtë mënyrë restaurohen metodat jo produktive të bashkëpunimit me partitë politike maqedonase. Nisur nga kjo shumë shpejtë do të kërkoj që organet e partisë të debatojnë lidhur me bashkëpunimin e mëtutjeshëm me RDK-në”, deklaroi  Orhan Ibrahimi, anëtarë i kryesisë qendrore dhe deputet i PDSH-së.