Zhvillimet politike dhe ekonomike në rajon ishin në fokusin e bisedimeve mes presidentit të Maqedonisë Gjorge Ivanov dhe homologut të tij nga Republika Serbe e Bosnjës, Millorad Dodik, sot në Shkup. Pas takimit dy presidentët nuk janë prononcuar për mediat ndërsa në komunikatën për shtyp të lëshuar nga Presidenca thuhet se Ivanovi ka shprehur “ kënaqësinë e për marrëdhëniet e mira dypalëshe si dhe ka vlerësuar lartë bashkëpunimin e përgjithshëm mes Republikës së Maqedonisë dhe Bosnje e Hercegovinës, përfshirë këtu edhe Republikën Serbe. Dy bashkëbiseduesit thuhet më tej në njoftim janë dakorduar që të thellojnë bashkëpunimin e mëtejmë në fushën ekonomike dhe forcimin e këmbimit tregtarë. Presidenti Ivanov ka theksuar se rajonit i nevojitet një perspektive e qartë në proceset e filluara integruese.

“Vendet e rajonit duhet të vazhdojnë rrugën për shmangien e pengesave për këmbimin e ndërsjellë tregtarë, afrimin politik dhe bashkëpunimin. Për këtë, integrimet euroatlantike  ofrojnë formën më të mire institucionale”. Ndërkohë, Dodik siç thuhet në komunikatë, e ka informuar homologun e tij maqedonas  për gjendjen aktuale politike dhe ekonomike në Republikën Serbe, si dhe në Bosnjë dhe Hercegovinë. Presidenti Ivanov është informuar nga homologu i tij për qëndrimet e Republikës Serbe lidhur me Bosnjën ndërsa  gjatë takimit ka përshëndetur formimin e Këshillit të ministrave të Bosnje e Hercegovinës.