Senati francez miratoi mbrëmë ligjin sipas të cilit mohimi i gjenocidit ndaj armenëve, i kryer nga perandoria Osmane në vitin 1915, trajtohet vepër penale. Tani, nëse dikush mundohet t’a kontestojë veprën e Osmanlinjve, patjetër të vuajë dënim prej një viti burg dhe të paguajë dënim në vlerë prej 45 mijë eurosh. Debati rreth ligjit kontestues zgjati 6 orë, ndërsa propozimi u miratua me 127 vota “pro” dhe 86 “kundër”. Që ligji të bëhet i plotfuqishëm, mbetet që të dekretohet nga presidenti Nikolas Sarkozi. Për Ankaranë zyrtare, vendimi i Senatit është i padrejtë, ndërsa ambasadori turk në Paris paralajmëroi se çmimin e një veprimi të tillë, do e paguajnë të tre shtetet.

“Kjo është një çështje shumë sentimentale për Turqinë. Ne, asnjëherë nuk do pranojmë ekzistimin e një ligji të këtillë. Tani, secili do paguaj një pjesë të çmimit. Edhe Turqia edhe Franca edhe Armenia. Të gjithë do pendohen për këtë”, deklaroi Tahsin Burkuoglu, ambasadori i Turqisë në Francë.
“Si ministër i punëve të jashtme mendoj se iniciativa është e papërshtatshme. Por, ky është vendim i Parlamentit. Ajo që desha sot, është t’i bëjë thirrje miqve turq të mbeten të qetë. Turqia është vend i madh, fuqi e madhe ekonomike, fuqi e madhe politike. Ne duhet të kemi marrëdhënie të mira me këtë vend”. Alen Zhype, ministër i jashtëm i Francës
Ndërkaq, Armenët, ditën e miratimit të këtij ligji do ta shkruajnë me shkronja të arta.
“Kjo ditë do të shkruhet me shkronja të arta jo vetëm në historinë e miqësisë mes Francezëve dhe Armenëve, por edhe në historinë e mbrojtjes së të drejtave të njeriut në botë”, u shpreh Eduard Nalbandijan, ministër i punëve të jashtme të Armenisë.
Sipas Armenisë, gjatë periudhës së perandorisë Osmane, prej vitit 1915 deri më 1917, janë vrarë të paktën 1.5 milion armenë. Turqia pohon se numri i viktimave sillet nga 250 mijë e deri në 500 mijë dhe e hedhin poshtë tezën për gjenocid. Shefi i diplomacisë turke, Ahmed Davutoglu deklaroi një ditë më parë se nëse Senati Francez miraton propozim ligjin, Ankaraja do ndërmarrë një sërë masash të reja kundër Francës.