Rrugë të bllokuara nga bora, mungesa e ngrohjes dhe kushtet mjeruese për mësim janë arsyet që në shumë shkolla fillorë të vendit fare të mos nis gjysmë-vjetori i dytë i vitit shkollor 2011-2012. Në fshatin Dragomisht i Madh të Kërçovës dhjetëra prindër kanë protestuar duke mos lejuar fëmijët e tyre të shkojnë në shkollë për shkak të kushteve jashtëzakonisht të këqija për mësim. Sipas tyre, shkolla periferike “Zeqir Dauti” është para rrënimit dhe rrezikon jetën dhe shëndetin e 50 nxënësve të këtij fshati, nga klasa e parë deri në të pestën. Prindërit me këtë rast i bëjnë apel Ministrisë së Arsimit të përfundojë ndërtimin e objektit të ri shkollor të nisur që para 6 viteve, në të kundërtën protestat do t’i zhvendosin në magjistralen Shkup-Ohër ku do të bllokojnë qarkullimin e makinave.

“Ne kemi vendos prej moti kohë por sot kemi marrë hapin e parë që ti kujtojmë ata se kemi bisedu edhe me drejtorin edhe me kryetarin e komunës, jo se ata kanë ndonjë qëllim të keq por kërkojmë prej Ministrisë së arsimit që të bëhet për një kohë më të shpejtë”.
“Neve na detyruan që sot të ndërmarrim këtë masë të rreptë dhe të jemi të mendimit se fëmijët tanë nuk do ti lëshojmë në shkollë përderisa nuk ndërmerren masa  që atyre tu jepen kushte normale për shkollën”.
Nga ana tjetër, drejtori I shkollës qendrore “Rexhë Rushit Zajazi”, Sulejman Dërvishi thotë se është i njoftuar me kushtet e vështira të shkollës në fjalë. Ai shton se në Ministrinë e Arsimit i ka dërguar të gjitha kërkesat e duhura për ndërtimin e objektit të ri shkollor dhe se ka hasur në gatishmëri për bashkëpunim, andaj sipas tij, mbetet vetëm çështje kohe. Madje ai ka ofruar një zgjidhje të përkohshme.
“Ne u ofruam atyre që përkohësisht për shkak të gjendjes reale, vërtet të kushteve të vështira që të bëjmë transfer përkohësisht të atyre nxënësve prej në shkollën periferike këtu në shkollën qendër. Dhe përpos kësaj bashkë me kryetarin e komunës e mori përsipër ta sigurojë edhe udhëtimin edhe pse nuk plotësojnë kriteret më ligj që duhet të ketë së paku dy kilometra për udhëtim. Mirëpo, një gjë të tillë ata nuk e pranuan dhe ja gjendja dhe situata është kjo”, tha Sulejman Dërvishi, drejtor i Sh.f “Rexhë Rushit Zajazi”.
Gjysmëvjetori i dytë gjithashtu nuk ka nisur edhe në tre shkolla të Komunës së Studeniçanit për shkak të rrugëve të bllokuara nga bora, ndërsa në Komunën e Strugës për shkak të problemeve me ngrohjen. Ndërkohë Ministria e Arsimit sot bëri të ditur se gjysmëvjetori i dytë shkollor ka nisur pa probleme përveç në disa komuna perëndimore të vendit të cilat janë përfshirë nga reshjet e mëdha të borës.