Këshilli i Mandateve mblidhet sot në Kuvend për të shqyrtuar nisjen e procedurës së heqjes së imunitetit të 3 deputetëve socialistë, me kërkesë të Prokurorisë së Përgjithshme. Në mbledhjen e sotme pritet të diskutohet në lidhje me heqjen e mandatit të deputetëve Besnik Baraj, Tom Doshi e Taulant Balla.

Kërkesa e organit të akuzës u dorëzua dje në Kryesinë e Kuvendit, me qëllim sqarimin e pozicionit të secilit prej deputetëve gjatë ngjarjes së 21 janarit.

“Për të sqaruar plotësisht pozicionin e deputetëve Besnik Baraj, Tom Doshi dhe Taulant Balla në raport me ngjarjet e datës 21.01.2011, për veprën penale të “organizimit dhe pjesëmarrjes në grumbullime dhe manifestime të paligjshme”, lind e domosdoshme kryerja e disa veprimeve hetimore ndaj tyre. Prokuroria e Përgjithshme i ka kërkuar Kuvendit të Shqipërisë dhënien e autorizimit për procedim të 3 deputetëve socialistë”, tha dje gjatë një konference për shtyp Prokurorja e Përgjithshme, Ina Rama.