Nga reshjet intensive të borës që kanë përfshirë Stambollin, është shkaktuar kaos që ka çuar me ndalimin e anijeve në port, metrove, autobusëve që lëvizin në akset që ndajnë pjesën evropiane dhe aziatike të këtij metropoli.

Një numër i madh i qytetarëve po shfrytëzojnë rrugët në këmbë për të kaluar urën Ataturk mbi Bosfor për të arritur në shtëpitë e tyre. 

Kjo është hera e parë që pas 20 viteve, të shihet ndonjë udhëtarë mbi këtë urë, pasi që 20 vite më parë ura ishte e ndaluar për udhëtarët. 

Për dy orë ka qenë  e bllokuar edhe lëvizja e makinave në autostradën që lidh Stambollin me Bursën. Nga Drejtoria për fatkeqësi natyrore bëjnë të ditur se situata është emergjente dhe se në terren janë shpërndarë ekipe për shpëtim dhe pastrimin e mirëmbajtjen e rrugëve nga vende të tjera të Turqisë. 

Sinoptikët në Turqi kanë parashikuar mot të ftohtë, reshje bore dhe ngrica që do të zgjasin për dy ditët e ardhshme.