Një ditë pas kishin takimin e parë, futbollistët e Shkëndijës startuan me seancat stërvitore në kuadër të përgatitjeve dimërore. Në stërvitjen e parë të ‘kuqezinjëve’, risia e parë ishte prania e mesfushorit Kemal Allomeroviq, i cili rrikthehet në Tetovë, pasi luajti edhe 6-të muajt e parë të vitit të kaluar, duke qenë pjesë e ekipit që fitoi titullin e kampionit.

Nga drejtuesit e klubit mësojmë se këto ditë priten edhe të tjera përforcime. Trajneri Shabani që në start aplikon nga dy seanca stërvitore, me atë që para dite ekipi punon në teren, ndërsa pas dite në palestër. ‘Në stinorin pranveror mund të them lirisht se do ta ndjekim Vardarin edhe pse është një diferencë prej 8 pikëve, kurse në pozitën e dytë është Metalurgu  ndërsa ne jemi të tretët. Ne do ta ndjekim pozitën e parë, por tash si do rrjedhin gjërat deri në fund do të shohim. Ne shpresojmë se do jemi në ato pozitat që dërgojnë në kualifikimet ose garave në Kupat Evropiane‘, deklaroi shefi i stafit teknik të Shkëndijës, Nexhat Shabani.Shkëndija në Tetovë do të qëndrojë deri më 2 shkurt, kur udhëton drejt Antalisë të Turqisë ku do të qëndrojnë deri më 18-të shkurt. Në këtë fazë është paraparë që ekipi të zhvillon 6-të përballje kontrolluese, ndërsa që tani janë definuar katër kundërshtarë.