Video materiali prej rreth 40 sekondash që u paraqit në faqet internetit tregon se si katër ushtarë amerikan urinojnë mbi trupat e tre talebanëve të vdekur. Incizimi sot shkaktoi reagime të bujshme në opinion dhe në komandën ushtarake amerikane. Për zëdhënësin e Pentagonit, pavarësisht se për cilët ushtarë bëhet fjalë, vepra është një akt trishtues. Nga shtabi i marinës thonë se ende nuk e kanë vërtetuar autenticitetin e materialit dhe prejardhjen e tij, por ai tash më ka shkaktuar reagime tek banorët në Afganistan.

“Vepra e ushtarëve amerikan është një kundërvajtje serioze. Gjithnjë deri sa po bëhen punë të këtilla ne nuk i duam në tokën tonë. Nuk duam ushtri të huaj në vendin tonë”.
Indinjatë nga incizimi tregoi edhe këshilli për marrëdhënie islamike – amerikane, duke e vlerësuar si provokues, si një akt i turpshëm dhe jo moral.
“Nëse vërtetohet se incizimi është autentik, fajtorët duhet të dënohen në pajtim me kodin unik të drejtësisë ushtarake dhe sipas ligjeve relevante amerikane”, theksohet në letrën e këshillit që i është drejtuar sekretarit amerikan të Mbrojtjes Leon Paneta. Ky është vetëm një nga vargu i incidenteve ku marrin pjesë ushtarët amerikan. Të dyshuarit për bashkëpunim me organizatën terroriste Al Kaeda dhe talebanët që kaluan disa muaj në burgjet amerikane në Bagram, në Afganistan pohojnë se vazhdimisht kanë qenë të keqtrajtuar nga ushtarët amerikan.