Aleanca KuqeZi dënon paditë penale të ngritura ndaj dy aktivistëve të saj në Maqedoni, Rinor Slloga dhe Petrit Ibrahimi, të cilët akuzohen për nxitje të urrejtjes ndëretnike, raporton agjencia e lajmeve NOA.al.

Dy aktivistët e AK-së u arrestuan pak ditë më parë pasi në 28 Nëntor të vitit 2011 vizatuan në një mur në hyrje të Tetovës në Maqedoni, sloganin e Aleancës Kuqezi “Një gjuhë, një komb”.

Aleanca KuqeZi i cilëson dy paditë e ngritura nga Gjykata Themelore e Tetovës si një kërcënim të hapur ndaj dinjitetit kombëtar dhe lirive të shqiptarëve në Maqedoni, të cilët nuk janë minoritet, por komb, që jetojnë në trojet e veta.

Aleanca KuqeZi i bën thirrje Gjykatës Themelore të Tetovës të shfuqizojë sa më parë këto padi penale ndaj Rinor Sllogës dhe Petrit Ibrahimit dhe të nisë të hetojë mbi sloganet raciste të tifozëve të ekipeve maqedonase, të cilët kanë thirrur: “Shqiptarët duhet të vdesin”.

Kjo aleancë i siguron aktivistët e saj se nuk do të rrijë duarkryq ndaj racizmit zyrtar të shtetit, ku jetojnë 800 mijë shqiptarë.

AK garanton respektimin e të drejtave të njeriut në bazë të ligjeve ndërkombëtare në fuqi, dhe i bën thirrje shtetit shqiptar të respektojë Kushtetutën e Republikës, e cila garanton mbrojtjen e shqiptarëve jashtë kufijve.

Aleanca KuqeZi i bën thirrje Tiranës zyrtare të reagojë kundrejt këtyre akteve të shëmtuara dhe shoviniste të strukturave sllave në rajon dhe të mbrojë me çdo kusht bashkëkombasit në Maqedoni, Mal të Zi, Kosovë dhe Luginën e Preshevës.