SHBA pranojnë të negociojnë me talibanët. Një ditë pasi talibanët njoftuan publikisht hapjen e një zyre të jashtme në Katar, për bisedime me SHBA-në, nga Departamenti amerikan i shtetit, zëdhënësja Viktoria Nuland tha se ‘SHBA do të mbështesë marrëveshjen, por me kushtin, vetëm nëse ajo çon në negocimin e përfundimit të luftës afgane. Edhe shtëpia e Bardhë, përmes një komunikate vlerësonte arritjen, por në të njëjtën kohë paralajmëronte se rruga e mbetur, është ende e gjatë.

Presidenti Barack Obama ka bërë të qartë mbështetjen dhe pjesëmarrjen e tij për një pajtim mbarëkombëtar afgan’, u shpreh zëdhënësi Jay Carney. Hapi i parë i negociatave mes talibanëve dhe SHBA-së mund të çojë në lirimin e dhjetëra të dënuarve nga burgu i Guantanamo Bay-t. SHBA janë duke e shqyrtuar një gjë të tillë, dhe lirimi i talibanëve, shumë prej tyre të mbajtur prej kohësh pa një akuzë fikse, mund të konsiderohet si një shprehje e mirëbesimit nga ana e amerikanëve. Të gjitha këto lëvizje vijnë një ditë pasi talibanët njoftuan për marrëveshjen paraprake me amerikanët si dhe hapjen e një zyre politike përtej detit, me qëllim zhvillimin e bisedimeve të paqes me SHBA-në. Kjo ishte hera e parë që ky grup ngre në mënyrë publike perspektivën për negociata paqeje pas më shumë se 10 vjet luftimesh, madje duke këmbëngulur shpeshherë se kurrë nuk do të ulej në bisedime me trupat e huaja, pa lënë më parë Afganistanin