Nuk do të thotë se nëse s’ke para dhe kushte nuk do të arrish rezultate shumë të mira në sportin ku garon. Se nuk është gjithmonë kështu, këtë e kanë dëshmuar kadetët e KF Milano nga Kumanova, të cilët me talentin e tyre, vullnetin e madh dhe angazhimin e treguar në fushën e futbollit kanë fituar titullin e kampionit vjeshtor në Superligën e Maqedonisë për kadetë në sezonin 2011/12.

“Të themi të vërtetën ky rezultat ka ardhur falë vullnetit dhe punës së fëmijëve dhe trajnerëve, të cilët nuk kanë sakrifikuar asgjë nga vetja për të arritur një sukses të tillë. Ne nuk kemi asnjë mbështetje financiare nga askush. Nuk na përkrahë as komuna, së cilës as që i shkom mendja se ekzistojmë bile si ekip. Dhe, për këtë arsye them se ky është një sukses i madh. Për ne është sukses i madh që garojmë në Superligen e Maqedonisë, nga se luajmë me ekipet elite të Maqedonisë që kanë gjendje të mirë financiare. Po garojmë vetëm e vetëm për të treguar se fubolli në Kumanovë ende është gjallë dhe se shqiptarët e këtij vendbanimi kanë talentë për këtë lloj sporti. Ku kemi luajtur kemi prezantuar qytetin e Kumanovës me dinjitet”, tha trajneri Ismet Zeqiri, ish-portier i njohur i klubeve nga Kumanova, Bashkimi e Milano, por edhe i disa skuadrave kosovare, sot professor i edukatës fizike.

Kadetët e Milanos prej 15 ndeshjeve të zhvilluara kanë arritur 12 fitore, 2 barazime, 1 humbje, duke grumbulluar 38 pikë me goldallim 49-19. Ata kanë lënë për gjashtë pikë mbrapa Rabotnickin, pastaj Metalurgun, Renovën e Shkëndijën.

“Rruga deri te titulli ishte shumë e gjatë dhe me shumë probleme, kur e dinim se kemi punë me ekipe cilësore, por në fushë çdo herë kemi dalur me synimin për të fituar dhe ia kemi arritur qëllimit”, shtoi ai.

Në radhët e kadetëve të Milanos ka disa lojtarë që meritojnë vëmendje më të madhe, siç janë: Tauland Seferi, i cili ka shënuar 14 gola në 19 ndeshje, kapiteni Mërgim Lutfiu, Egzon Beqiri, Herolind Musliu e tjerë. Për këta dhe të tjerët do të dëgjohet shumë shpejtë.