Persona të panjohur kanë hedhur në det bustin e Franjo Tugjmanit, ish-presidentit të parë të Kroacisë pas çlirimit dhe pavarësimit të saj, që më parë e kishin shkulur nga parku përkujtimor në vendbanimin bregdetar Tribunj, në rrethinat e qytetit Shibenik.

Në ndërkohë busti është nxjerrë nga deti, por me dëmtime të vogla. Menjëherë pas kësaj busti është kthyer në vendin e mëparshëm në park, raportojnë mediet kroate.

Komuna e Tribunjit dhe policia do të bëjnë kallëzim penal ndaj kryesit të këtij akti, që ka ndodhur natën e 31 janarit.

Shoqatat e luftëtarëve kërkuan nga institucionet kompetente që të gjykojnë këtë akt, t’i gjejnë kryesit e veprës dhe t’i ndëshkojnë fuqishëm ata.