Presidenti Bamir Topi duke bërë një analizë të ngjarjeve të cilat u shënuan në vitin që po lemë pas është shprehur se një nga ngjarjet më të vështira të vitit 2011 është edhe ngjarja e 21 janarit e cila sipas tij krijoi një situatë të vështirë në vend.

Në një prononcim për Deutsche Welle Topi deklaroi se një prej arsyeve të mosmarrjes së statusit të vendit kandidat për në BE, përveç disa elementëve të tjerë që lidhen me plotësimin e rekomandimeve të Komisionit Europian, ishin edhe ngjarjet e janarit.

Sa i përket luftës kundër korrupsionit, presidenti ka shprehur konsideratë për njërëzit e ligjit por për të qenë të gjithë të barabartë para ligjit, sipas tij politikanët dhe gjyqtarët duhet të lënë imunitetin.

Ndërkohë pyetjes mbi marrëdhëniët e tij me maxhorancën, Topi u shpreh se nuk shqetësohej nga akuzat e partive politike dhe se interesohej më shumë për opinionin që kishte qytetari për Presidentin e Republikës. Sipas tij Presidenti duhet të jetë i shkëputur nga interesat partiake dhe fakti që Presidenti akuzohet në këtë linjë është tregues i korrektësisë institucionale dhe konstitucionale të Presidentit, në përmbushje të detyrimeve madhore të tij si President i Republikës.