Paraburgimi për të akuzuarit në rastin “Merimanga” të zëvendësohet me një masë më të lehtë të sigurisë. Kështu ka kërkuar edhe një herë LSDM opozitare sot para gjykatës në Shkup.

Me rastin e njëvjetorit të arrestimit të Velija Ramkovskit dhe bashkëpunëtorëve të tij nga televizioni A1 dhe firmave tjera në rrugën ‘Pero Nakov’, deputetët e LSDM-së dhe simpatizuesit e tyre kërkuan nga prokuroria të tregojë më shumë humanizëm dhe masa e paraburgimit të paktën për personat e sëmurë, të zëvendësohet me masë më të lehtë. Ndërkohë në Gjykatën Themelore ‘Shkupi 1’ edhe më tej vazhdon procesi gjyqësor për të akuzuarit ne rastin “Merimanga”. Në këtë proces gjyqësor në bankën e të akuzuarve gjenden ish pronari i televizionit A1, Velija Ramkovski  dhe 22 persona tjerë, të gjithë të akuzuar për pastrim parash, keqpërdorim të detyrës zyrtare si dhe fshehje të tatimit.