Banorë të fshatit Vellushinë të komunës së Manastirit theksojnë se personat dhe qarqet që dogjën shtëpitë shqiptare në vitin 2001 në Manastir janë të implikuar në tensionimin dhe akuzat ndaj popullsisë shqiptare në fshatin Vellushinë.

Në këto skenare zërat flasin për implikimin edhe të qarqeve klerike ortodokse, por edhe ato partiake. 

Mediat maqedonase ditëve të fundit në fshatin e përzier etnikisht me shqiptarë dhe maqedonas kanë raportuar se këta të fundit ndjehen të kërcënuar nga shqiptarët, që siç thuhet grabisin pronat e tyre. 

Përparim Lika, banorë i fshatit Vellushinë deklaroi për agjencinë e lajmeve INA se të gjithë akuzat janë pjellë e skenareve dhe komplotistëve që janë të njohur në rajonin e Manastirit. 

”Ne këtu jemi dem baba dem dhe kemi tokat tona. Gjithashtu kemi blerë me djersën tonë edhe tokat maqedonase, duke paguar trefish me shtrenjtë. Ato janë tokat tona. Tani në pamundësi për të rikthyer ato prona dhe nga largimi masiv i maqedonasve nga fshati, krijohen dhe shfaqen skenare të panevojshme dhe tendencioze në kundërshtim me shqiptarëve. Disa nga veprat e tyre janë skandaloze ashtu si veprimi që shkollën lokale ta shëndërrojnë në muze, pasi që nuk ka nxënës për të vijuar mësimin dhe nga ana tjetër të mos lejohen nxënësit shqiptarë”, theksoi Lika. 

Sipas tij, akuzat se gjoja ka vjedhje janë të dëmshme dhe shpifëse, sepse siç tha ai, ndodhë e kundërta në këtë rajon, ku shqiptarët ndihmojnë në forma të ndryshme humanitare familje të varfëra maqedonase. 

Banorët shqiptarë të Vellushinës theksojnë se nuk kanë çka të vjedhin nga maqedonasit, pasi që nuk ka ndonjë gjë që mund të jetë me vlerë apo e vlerësuar. 

Sipas tyre, ditëve të fundit në fshat janë sjellë edhe patrulla policore, të ftuara nga grupet maqedonase që inicuan ngjarjet e fundit në këtë fshat të banuar me më shumë shqiptarë, që shtrihet disa kilometra nga kufiri me Greqinë. Nga ana tjetër, maqedonasit e këtij fshati nuk kanë dashur të prononcohen për agjencinë e lajmeve INA lidhur me problemet dhe tensionet e nxitura.