KF Renova përfundimisht ka mbetur pa treshen kosovare Faruk Statovci, Fisnik Gashi e Samir Sahiti. Një lajm të tillë e ka konfirmuar edhe vetë drejtori sportiv, i bardhekaltërve nga Xhepçishti, Lirim Saiti. Ky i fundit përmes gazetës sonë shfrytëzoi rastin të falënderoj tre lojtarët kosovarë për kontributin e tyre që kanë dhënë në bluzën e Renovës.

“Ne falënderojmë Statovcin, Gashin e Saitin për mundin e tyre që kanë dhënë për ngjyrat e klubit tonë gjatë viteve sa kanë luajtur tek ne. Ndarja ka qenë e pranueshme nga të dyja palët dhe këtu s’ka asgjë të keqe. Qëllimi i drejtuesve të klubit është të ripëtrijmë ekipin me futbollistë të rinj dhe për këtë arsye kemi marrë një hap të këtillë. Shpresoj se do të gjejmë përforcime adekuate për tre futbollistët në fjalë”, tha Saiti. Ai bëri me dije se bashkëpunimin me Renovën e ka vazhduar Ristov. Mësojmë se Statovci e Sahiti do të përforcojnë ekipin e Drenicës ku trajner është Bylbyl Sokoli.