Koncerti i këngëtares së famshme Ciara, i cili ishte paralajmëruar se do të mbahej më 28 dhjetor, është shtyrë për muajin prill të vitit 2012, ka konfirmuar për Telegrafi.com Drin Zatriqi, organizator i koncertit.

Edhe pse pagesa është bërë sipas kërkesës të menaxhmentit të saj dhe gjithçka ishte gati për një mega-koncert, këngëtarja amerikane ka anuluar ardhjen e saj në Kosovë. Organizatorët e koncertit kishin pranuar një komunikatë për anulim të koncertit gjatë të shtunës, me arsyetimin se Ciara ka një ofertë të majme për një koncert në Dubai, i cili do të organizohet më datën 29 dhjetor.

Sipas agjencisë “MOS Music Entertainment” që menaxhon koncertet e këngëtares, ajo nuk do të jetë në gjendje të arrijë nga Kosova në Dubai në kohën e duhur për shkak të orarit të fluturimeve dhe dallimit në kohë. Agjencia në fjalë ka ofruar artistë të tjerë për ta zëvendësuar Ciaren për datën 28 dhjetor si: Flo Rida, Ice-T, Salt-N-Pepa, T-Pain, Fabolous, Jadakiss, Lil Kim, Kelly Rowland dhe Keri Hilson. Megjithatë, kjo ofertë nuk është pranuar nga organizatorët e koncertit të Kosovës për shkak kohës shumë të shkurtër.

Sipas Drin Zatriqit, Ciara do të vijë në Kosovë në muajin prill të vitit të ardhshëm, kur janë në plan edhe koncerte të tjera të yjeve me famë botërore . “Gjatë vitit 2012 synojmë të sjellim Ciara, Lik Kim dhe Rick Ross, por edhe të tjerë”, ka shtuar Drini Zatriqi.