Kryeministri Nikolla Gruevski ka deklaruar se marrëdhëniet midis Maqedonisë dhe Serbisë do të vazhdojnë të përparojnë dhe të thellohen.

Ai këtë e deklaroi dje pasdite në takimin me presidentin serb Boris Tadiç, i cili edhe sot po vijon vizitën e tij dyditore në Shkup, në kuadër të një forumi ekonomik midis kompanive të të dyja vendeve. 

Gruevski në takimin me Tadiq ka vlerësuar rezultatet e bashkëpunimit të deritanishëm dhe marrëveshjeve të arritura, duke nënvizuar marrëveshjen më të fundit për bashkëpunimin dhe shkëmbimin e policive të të dy vendeve, marrëveshjen për kalimet kufitare me letërnjoftime, marrëveshjet për hapjen e pikave të reja kufitare dhe marrëveshje të tjera për bashkëpunim ekonomik, tregtar, kulturor, etj. 

Kryeministri Gruevski gjithashtu ka shprehur gatishmërinë që Maqedonia të ndihmojë Serbinë me përvojën e saj të deritanishme në procesin e anëtarësimit të saj në Bashkimin Evropian. 

“Në takimin e përbashkët është konkluduar se marrëdhëniet midis dy vendeve duhet të vazhdojnë të përparojnë gjatë periudhës së ardhshme, duke nënvizuar me theks të veçantë aspiratat e përbashkëta për anëtarësim në BE dhe krijimin e kushteve për prosperitet në tërë rajonin e Ballkanit”, thuhet në komunikatën e kryeministrit Gruevski pas takimit me presidentin Tadiq.