OSBE-ja në kuadër të realizimit të projektit “Përkrahja e Muzeut Etnografik të Vushtrrisë”, bashkë me drejtuesit e pushtetit lokal kanë inauguruar donacionin e dhënë nga OSBE-ja për muzeun e qytetit të Vushtrrisë me katër kabinete për vendosje të eksponateve.

Në këtë ceremoni inauguruese, nënkryetari i komunës së Vushtrrisë, Dibran Përçuku ka falënderuar zyrtarët e OSBE-së, për donacionin dhe interesimin për mbrojtjen dhe kultivimin e vlerave të trashëgimisë kulturore lokale.

“Donacioni ka vlerë të veçantë, pasi ka të bëjë me krijimin e kushteve shumë më të mira në ekspozim të vlerave të trashëgimisë sonë kulturore” ka thënë Përçuku.

Zyrtarja e OSBE-së për trashëgimi, Silke Nebenfur në këtë ceremoni inauguruese theksoi “Jemi të angazhuar për mbrojtjen dhe promovimin e monumenteve kulturore në Kosovë. Me dhurimin e këtyre katër kabineteve mendojmë që sadopak të ndihmojmë që njerëzit t’i shohin këto eksponate në mënyrë më të lehtë “, ka thënë Nebenfur.

Zyrtarët e OSBE-së, për donacionin e dhënë i ka falënderuar edhe drejtori i Drejtorisë së Kulturës, Rinisë e Sportit në komunën e Vushtrrisë, Qamil Sahiti, gjersa menaxherja e Muzeut Historik Etnografik, Shukrane Begu i ka njoftuar të pranishmit me eksponatet dhe vlerat që ofrojnë ato të vendosura në muze.