Prokuroria vihet në lëvizje në lidhje me skandalin e trukimeve që ka përfshirë futbollin shqiptar. Raportimet më të fundit të Super Sport bëjnë të ditur se çështja do të merret në shqyrtim nga Prokuroria e Tiranës e cila do të nisë fillimisht një proces verifikimi.

Ende nuk dihet nëse do të jetë një prokuror i vetëm apo një grup prokurorësh të cilët do të merren me verifikimin paraprak të cështjes. Hapi i parë i organit të akuzës do të jetë marrja në cilësinë e provave të dokumentacionit te përpiluar nga Uefa dhe të dhënave të tjera në lidhje me trukimin e 13 ndeshjeve të Kategorisë Superiore .

Prokuroria do të shqyrtojë me kujdes çdo informacion dhe vetëm nëse do të konstatojë gjatë verifikimit elementët e veprës penale do të vendos të hapë një proces të mirëfilltë hetimi duke bere dhe kallëzimin penal i cili do të pasohet me hetime të imtësishme dhe marrjen e dëshmive të nevojshme për të siguruar provat për venien e përgjegjësve para drejtësisë.

Prokuroria e rrethit gjyqësor Tiranë u vu në lëvizje pas bërjes publik të lajmit në media dhe sipas organit të akuzës nuk ka marrë ende ndonjë kërkesë nga ana e Federatës Shqiptare të Futbollit për 12 ndeshjet e dyshuara se janë trukuar gjatë sezonit 2010-2011.