Të dhënat e fundit të shkëmbimit tregtar midis Maqedonisë dhe Kosovës kanë shënuar trende pozitive në favor të Shkupit.

Nga të dhënat e Odës Ekonomike të Maqedonisë Veriperëndimore (OEMVP) dhe Ministrisë së Ekonomisë ka rritje drastike të eksportit të mallrave drejt Kosovës, sidomos pas barrierave tregtare të Kosovës ndaj Serbisë. 

Sipas të dhënave jozyrtare, për 92 milion euro është rritur eksporti drejt Kosovës në periudhën prej muajit janar deri në tetor të këtij viti, në krahasim me vitin e kaluar. 

OEMVP vlerëson se në rast se do të vazhdojë trendi i barrierave tregtare dhe kushtëzimit për reciprocitet me Serbinë, Maqedonia mund të përfitojë dhe të ketë leverdi të pakrahasueshme nga tregu i Kosovës. 

Sa i përket mallrave të eksportit, dominon nafta, por janë edhe materialet ndërtimore dhe ato ushqimore që eksportohen dhe kërkohen në tregun e Kosovës. 

Sipas të dhënave të Entit shtetëror të Statistikave në Shkup, nafta gjatë vitit 2010 dhe 2011 përbën rreth 50 për qind të eksporteve me Kosovën.