Lidhja Demokratike e Kosovës ende nuk ka vendosur për emrin e kandidatit për president. Lutfi Haziri nga kjo parti ka paralajmëruar se LDK-ja do të dalë me një emër fitues për zgjedhjet e ardhshme presidenciale.

Haziri në një intervistë për “Epokën e Re” ka deklaruar se hëpërhë i vetmi kandidat konsensual në LDK për president është Isa Mustafa.

“Isa Mustafa është lider i partisë. Tani për tani është emri më konsensual në LDK për president. Por, do të jetë ai që do të vendosë për këtë çështje”, është shprehur Haziri, duke hedhur poshtë spekulimet se LDK-ja së bashku me AAK-në do të dalin me një kandidat të përbashkët.

“Çdolloj kandidature për president do të vijë brenda LDK-së”, është shprehur Haziri.

Ai ka thënë se LDK-ja do ta nxjerrë një emër fitues për zgjedhjet e ardhshme presidenciale. E, i pyetur rreth lakimit të emrit të Fatmir Sejdiut e të Sabri Hamitit për kandidatë të mundshëm për president, Haziri ka thënë se për këtë çështje nuk është diskutuar asnjëherë në LDK.

Po ashtu, ai ka thënë se LDD-ja dita-ditës po shkrihet në LDK, duke marrë shembull rastin në Komunën e Gjilanit. Haziri u ka bërë ftesë të hapur Nexhat Dacit dhe listës “Ibrahim Rugova” që të rikthehen në LDK.