Presidentja Kosovës, Atifete Jahjaga mori pjesë në mbrëmjen e bamirësisë, organizuar nga organizata “Down Syndrome Kosova”, me qëllim mbledhjen e fondeve për programet në ndihmë të fëmijëve dhe personave të prekur me sindromin Down.

“Kam ardhur këtu në mesin tuaj t’ju shprehë përkrahjen time simbolike por edhe institucionale për të gjithë fëmijët e prekur me sindromën down”, tha presidentja Jahjaga, duke iu drejtuar fëmijëve, prindërve dhe pjesëmarrësve të tjerë.
Ajo tha se kjo kategori e shoqërisë do të ketë përkrahjen e vazhdueshme të institucioneve të Republikës së Kosovës, ashtu siç e kanë përkrahjen e familjeve dhe më të afërmve, që jeta dhe ardhmëria e tyre të jetë normale dhe që të zhvillohet në kushte dhe rrethana të barabarta si të tjerët.
“Jemi të gjithë së bashku të krijojmë kushtet më të mira për fëmijët tanë të ndihmojmë, të përkrahim, të respektojmë dhe ta duam njëri-tjetrin”, theksoi presidentja Jahjaga.